الصيف شوّا جلودنا يالمناعيـر
وقررت انا وفلان نطلع بإجـازه
قلنا على اول رحلة اقلاع بنطير
كلٍ مجهز شنطته مـع جـوازه
نبغي ندوّج في فرنسا على خير
وجنيف وميونخ وبرشـا وبـازه
ونبغي من اوروبا نحدّر لأغادير
ونزور كازه سعد من زار كازه
للمااااء والخضرة وبيض الغنادير
والشرق الاوسط مالنا فيه عازه
الشرق الاوسط للفقارى المعاثير
اللي جداهـم عـازلٍ للقـزازه
واللي قعد قصده تقشّف وتوفيـر
مايدري ان تالي حياتـه جنـازه
واللي ذخر الاجازه لهدة الطيـر
متشقوي بطيره وريشة جهـازه
باروح انا وفلان زبن المخاسير
دام الحجازي ماتعـدى حجـازه
لكن ... تفاجأنـا بحمـى الخنازيـر
خبر على الشاشات مـازال طـاااازه
مرض خطير ومالقـوا لـه عقاقيـر
لجـل الوقايـه منـه والا اجتـيـازه
فيروس متنقـل بسرعـة الاعاصيـر
قالوا 100 منصـاب تـم احتجـازه
ثم حذّرونـا مـن ركـوب الطياييـر
يمكن حدا ركـاب الاسيـات حـازه
وثارت علي من الطـواري طوابيـر
وامسيت كـن الكبـد فيهـا حـزازه
محتـار فكـري يالنشامـا المناعيـر
الصيف جانا .. وين نقضي الاجازه؟؟